ព័ត៌មាន

(រាជធានីភ្នំពេញ) នៅថ្ងៃទី២២ ខែមេសា ឆ្នាំ២០២៦ ឯកឧត្តម ចាយ បូរិន រដ្ឋមន្ត្រីក្រសួងធម្មការនិងសាសនា អនុញ្ញាតឱ្យលោកស្រី Deepika Singh (ឌីពីកា ស៊ីង) អគ្គលេខាធិការរង នៃសាសនាដើម្បីសន្តិភាពអន្តរជាតិ និងតំណាងសាសនាផ្សេងៗនៅកម្ពុជា ចូលជួបសវនាការ សម្តែងការគួរសមនិងពិភាក្សាការងារ នៅទីស្តីការក្រសួង។

នៅក្នុងជំនួបនេះ លោកស្រី អគ្គលេខាធិការរងនៃសាសនាដើម្បីសន្តិភាពអន្តរជាតិ នាឱកាសនេះ បាននាំមកនៅគោលបំណងសំខាន់ៗជម្រាបជូន ឯកឧត្តមរដ្ឋមន្ត្រី រួមមាន៖
១. ជម្រាបជូនអំពីប្រវត្តិរបស់ក្រុមប្រឹក្សា អង្គរសាសនា កម្ពុជាដែលចូលមកប្រទេសកម្ពុជា ក្នុងការកសាងសន្តិភាព សុខភាព សាធារណៈ និងការអភិវឌ្ឍន៍ប្រកបដោយនិរន្តរភាព ជំនាញក្នុង ការសហការពហុសាសនា ស្របនិងគោលនយោបាយរបស់ រាជរដ្ឋាភិបាលកម្ពុជា។
២.ស្នើរសុំបន្តកិច្ចសហប្រតិបត្តិការ អង្គការពុទ្ធសាសនាជាមួយ ក្រសួងធម្មការនិងសាសនា។

ជាការឆ្លើយតប ឯកឧត្តមបណ្ឌិតរដ្ឋមន្ត្រី បានមានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តែងជំរុញលើកទឹកចិត្តគ្រប់សាសនាក្នុងការបដិបត្តិទៅតាមគន្លងសាសនានីមួយៗពិសេសលើកកម្ពស់តម្លៃសីលធម៌ក្នុងសង្គម។

ដោយឡែកក្នុងកិច្ចការជាមួយអង្គការ ឯកឧត្តមបណ្ឌិតរដ្ឋមន្ត្រី បានស្នើរឱ្យមានការរៀបចំនៅរចនាសម្ពន្ធ័ឡើងវិញ ដោយ សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត នន្ទ ង៉ែត សម្តេចព្រះមហាសង្ឃរាជ គណៈមហានិកាយនៃព្រះរាជាណាចក្រកម្ពុជា ជាសហប្រធាន ជំនួសសម្តេចព្រះអគ្គមហាសង្ឃរាជា ធិបតីកិត្តិឧទ្ទេសបណ្ឌិត ទេព វង្ស អតីតសម្តេចព្រះមហាសង្ឃរាជ ។ ក្នុងនោះ ឯកឧត្តមរដ្ឋមន្ត្រី បានស្នើរឱ្យ អង្គការបន្តជួយលើវិស័យសាសនាទាំងអស់នៅក្នុងប្រទេសកម្ពុជា ដោយ ស្របទៅនិងច្បាប់របស់ប្រទេសផងដែរ។

ឯកឧត្តម សង្ឃឹមថា តាមរយៈកិច្ចសហប្រតិបត្តិការនេះ ក្រសួងនិងអង្គការនិងបន្តកិច្ចការជាមួយគ្នា ក្នុងការអភិវឌ្ឍវិស័យសាសនាឱ្យរីកចម្រើន សូមលោកស្រី អគ្គលេខាធិការរងនៃសាសនាដើម្បីសន្តិភាពអន្តរជាតិ ពាំនាំនូវសំលេងដែលកម្ពុជា កំពុងត្រូវការ គឺសន្តិភាព ហើយកម្ពុជាការពារតែសម្បត្តិនិងដែន អធិបតេយ្យភាពរបស់ខ្លួនតែប៉ុណ្ណោះ ។

នាឱកាស ឯកឧត្តមបណ្ឌិតរដ្ឋមន្ត្រី សូមជូនពរលោកស្រី និង សហការី និងតំណាងសាសនាទាំងអស់ នៅក្នុងឱកាសចូលឆ្នាំសូមទទួលបានជោគជ័យគ្រប់ភារកិច្ច៕

(រាជធានីភ្នំពេញ) នៅថ្ងៃសៅរទី១៨ ខែមេសា ឆ្នាំ២០២៦ ឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការនិងសាសនា អញ្ជើញចូលរួមពិធីបុណ្យបញ្ចុះបឋមសិលា កសាងកុដិ “មហាសុវណ្ណសុគន្ធកុដិ សម្តេចព្រះសាក្យមុនី រ័ត្ន សាវឿន” ប្រគេន ព្រះសង្ឃ នៅវត្តសុវណ្ណមុនីសាគរ ហៅវត្តសំរោងអណ្តែត ស្ថិតនៅសង្កាត់គោកឃ្លាង ខណ្ឌសែនសុខ រាជធានីភ្នំពេញ។

ពិធីនេះមានការយាងជាព្រះរាជាធិបតីពីសំណាក់ សម្តេចព្រះ មហាសុមេធាធិបតី កិត្តិបណ្ឌិត អំ លឹមហេង សម្តេចព្រះសង្ឃនាយក គណៈមហានិកាយនៃព្រះរាជាណាចក្រកម្ពុជា ព្រមទាំងយាង និមន្តចូលរួមរបស់ សម្តេចព្រះសង្ឃនាយករង សម្តេច ព្រះរាជាគណៈ ព្រះថេរានុត្ថេរៈជាច្រើនព្រះអង្គ ឯកឧត្តម លោកជំទាវ ថ្នាក់ដឹកនាំក្រសួងធម្មការនិងសាសនា និងប្រជាពុទ្ធបរិស័ទជិតឆ្ងាយយ៉ាងច្រើនកុះករ ។

ការកសាងសង់សំណង់ដែលបម្រើដល់វិស័យព្រះពុទ្ធសាសនាត្រូវ បានរៀបចំតាមក្បួនខ្នាត និងរចនាបទខ្មែរត្រឹមត្រូវ។ ដោយឡែក សំណង់វត្តអារាមនានាទូទាំងប្រទេស ត្រូវបានអភិវឌ្ឍយ៉ាង ឆាប់រហ័ស សមស្របតាមគោលនយោបាយរបស់រាជរដ្ឋាភិបាល កម្ពុជា ដែលសម្តេចតេជោ និងសម្តេចធិបតី តែងយកចិត្តទុកដាក់ និងផ្តល់អនុសាសន៍ណែនាំ ដល់ក្រសួងធម្មការនិងសាសនា សហការជាមួយគណសង្ឃនាយក ក្នុងការពិនិត្យយ៉ាងលំអិតអំពី រចនាបថ ជាពិសេសអភិរក្ស និងកសាងសំណង់វត្តអារាម។

ក្រោយថ្ងៃរំដោះ៧ មករា ១៩៧៩ កម្ពុជាបានទទួលសេរីភាព ឡើងវិញ និងបានបោះជំហានប្រែក្លាយពីប្រទេសដែលខ្ទេចខ្ទាំ ដោយសង្គ្រាម រហូតមានការអភិវឌ្ឍន៍លើកគ្រប់វិស័យ ក្រោមការ យកចិត្តទុកដាក់របស់ប្រមុខរដ្ឋាភិបាល ដែលដឹកនាំដោយបិតា ស្ថាបនិក នយោបាយឈ្នះ-ឈ្នះ សម្តេចអគ្គមហាសេនាបតី តេជោ ហ៊ុនសែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា បាននាំយកនូវសន្តិភាពជូនប្រទេស និងបានបន្តដឹកនាំ ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែល តែងយកចិត្តទុកដាក់លើព្រះពុទ្ធសាសនា ជាសាសនារបស់រដ្ឋ។

សូមជម្រាបជូនថា “មហាសុវណ្ណសុគន្ធកុដិ សម្តេចព្រះសាក្យមុនី រ័ត្ន សាវឿន” ដែលគម្រោងនិងសាងសងនាឱកាសនេះ មាន បណ្តោយប្រវែង ៣៣ម៉ែត្រ ទទឹង២១ម៉ែត្រ និងមានកំពស់៤៥ ម៉ែត្រ ដើម្បីប្រគេនព្រះសង្ឃ និងឧទ្ទិសចំពោះព្រះពុទ្ធសាសនា ដែលជាសាសនារបស់រដ្ឋ។

នៅក្នុងឱកាសចូលឆ្នាំថ្មីប្រពៃណីទំនៀមទម្លាប់ខ្មែរ ឆ្នាំមមី អដ្ឋស័ក ឆ្នាំសាកល២០២៦ សូមបួងសួងដល់ គុណបុណ្យ ព្រះរតនត្រ័យកែវទាំងបី វត្ថុស័ក្តិសិទ្ធិក្នុងលោក ទេវធីតារក្សា ព្រះរាជាណាចក្រកម្ពុជា ជាពិសេសទេវតាឆ្នាំថ្មីព្រះ នាម រាក្យសា ទេវី សូមប្រោះព្រំសព្ទសាធុការពរ បវរសួស្តី សេរីមង្គល វិបុលសុខមហាប្រសើរជូនចំពោះ ឯកឧត្តម និង លោកជំទាវ ព្រមទាំងកូនចៅ ទទួលបាននូវពុទ្ធពរទាំង៤ប្រការគឺៈ អាយុ វណ្ណៈ សុខៈ ពលៈ ជានិច្ចនិរន្តរ៍ ។

ឯកឧត្តម ចាយ បូរិន រដ្ឋមន្ត្រីក្រសួងធម្មការនិងសាសនា និង លោកជំទាវ សូ ភត្រា ចាយបូរិន ប្រធានកិត្តិយសសមាគមនារី កម្ពុជាដើម្បីសន្តិភាពនិងអភិវឌ្ឍន៍ក្រសួងធម្មការនិងសាសនា បាន អញ្ជើញដឹកនាំ មន្ត្រីរាជការក្រសួង ប្រារព្ធរៀបចំពិធីសូត្រមន្ត ចម្រើនព្រះបរិត្ត ប្រសិទ្ធិពរជ័យ សិរីមង្គល ដើម្បីត្រៀមទទួលអំណរ ទេវតាឆ្នាំថ្មី ឆ្នាំមមី អដ្ឋស័ក ព.ស.២៥៧០ ព្រះនាម «រាក្យសាទេវី» ដែលនឹងយាងចុះមកនៅវេលាម៉ោង ១០:៤៨នាទីព្រឹក ថ្ងៃអង្គារ ១២រោច ខែចេត្រ ត្រូវនឹងថ្ងៃទី១៤ ខែមេសា ឆ្នាំ២០២៦ ខាងមុខនេះ។

ឯកឧត្តម ចាយ បូរិន និងលោកជំទាវ និងថ្នាក់ដឹកនាំក្រសួងធម្មការនិងសាសនា បានអញ្ជើញបូជាទៀនធូប ផ្កាភ្ញី គ្រឿងសក្ការៈនានា ថ្វាយរូបសំណាកព្រះពុទ្ធបដិមា នៅបរិវេណសួនច្បារនៃទីស្តីការក្រ សួង និងបាននិមន្តសម្តេចព្រះឧត្តមបញ្ញា កិត្តិបណ្ឌិត ដូង ផង់ និង ព្រះមន្ត្រីសង្ឃទាំង២គណៈ ស្វាធ្យាយជយន្តោ ពុទ្ធជ័យមង្គល ទៅតាមគន្លងប្រពៃណីព្រះពុទ្ធសាសនាដ៏ផូរផង់ ជាកិច្ចជូនដំណើរឆ្នាំ ចាស់ និងត្រៀមទទួលអំណរសាទរឆ្នាំថ្មី ឆ្នាំមមី អដ្ឋស័ក ព.ស.២៥៧០ ជាថ្ងៃចូលឆ្នាំខ្មែរមានរយៈពេល ៣ថ្ងៃ ចាប់ពីថ្ងៃទី១៤ ១៥ និង១៦ ខែមេសា ឆ្នាំ២០២៦។

នាឱកាសដ៏មហាជ័យមង្គលនេះ ឯកឧត្តម ចាយ បូរិន ក្នុងនាម ថ្នាក់ដឹកនាំ ក្រសួងធម្មការនិងសាសនា សូមបួងសួងដល់ទេវតាឆ្នាំថ្មី សូមថ្វាយព្រះរាជសព្ទសាធុការពរបវរ មហាប្រសើរ ថ្វាយចំពោះ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះ មហា ក្សត្រ នៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត និងសម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតា ជាតិខ្មែរ សូមព្រះអង្គទាំងទ្វេរ ព្រះរាជសុខភាពល្អបរិបូរណ៌ ព្រះ កាយពលមាំមួន ព្រះបញ្ញាញាណភ្លឺថ្លា ដើម្បីគង់ប្រថាប់ជាម្លប់ដ៏ ត្រជាក់ត្រជុំ សុខដុមរមនា របស់ប្រជារាស្ត្រខ្មែរ ជាកូនចៅ ចៅទួត របស់ព្រះអង្គជានិច្ចនិរន្តរ៍តរៀងទៅ ។

ពិសេសសូមបួងសួង ទេវតាឆ្នាំថ្មី សូមជួយថែរក្សាអភិបាលប្រោះព្រំ សិរីមង្គល ជូនចំពោះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន កាកបាទក្រហមកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត សូមបានប្រកបតែនឹងព្រះពុទ្ធពរទាំងបួន ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ព្រមទាំង បន្តសម្រេចបានជោគជ័យគ្រប់ភារកិច្ចថ្មីៗបន្ថែមទៀត សម្រាប់ជា ឧត្តមប្រយោជន៍ជាតិនិងមាតុភូមិកម្ពុជា។

ក្នុងឱកាសនេះ ថ្នាក់ដឹកនាំក្រសួងធម្មការនិងសាសនា រៀបចំការ សម្តែងរបាំជូនពរ និង របាំត្រុដិ ដែលជារបាំប្រពៃណីជាតិដ៏មាន អត្ថន័យ សម្រាប់បោសសម្អាតឧបទ្រពចង្រៃក្នុងឆ្នាំចាស់ និង ប្រសិទ្ធពរជ័យសិរីសួស្តីសម្រាប់ឆ្នាំថ្មី។

បន្ថែមពីនេះ ថ្នាក់ដឹកនាំ និងមន្ត្រីរាជការទាំងអស់ ក៏បានចូលរួម លេង «ល្បែងប្រជាប្រិយខ្មែរ» យ៉ាងកុះករ និងក្នុងបរិយាកាស ស្និទ្ធស្នាលបំផុត។ ការរៀបចំឱ្យមានរបាំប្រពៃណី និងល្បែង ប្រជាប្រិយនេះ មិនត្រឹមតែបង្កើតនូវភាពសប្បាយរីករាយ និង សាមគ្គីភាពផ្ទៃក្នុងប៉ុណ្ណោះទេ ប៉ុន្តែថែមទាំងជាការរួមចំណែកយ៉ាង សំខាន់ក្នុងការ ថែរក្សា លើកស្ទួយ និងបង្អួតបង្ហាញនូវអត្តសញ្ញាណ វប្បធម៌ដ៏រឹងមាំរបស់ជាតិ ទៅកាន់សាធារណជន ស្របតាមគោលការណ៍របស់រាជរដ្ឋាភិបាលកម្ពុជា ៕

-សារអបអរសាទរ របស់ក្រសួងធម្មការនិងសាសនា

-ព្រះរាជសារលិខិតថ្វាយព្រះពរ សូមចម្រើនពរថ្វាយ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា

-ព្រះរាជសារអបអរសាទរ សម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា និងជាព្រះប្រធានគណៈសង្ឃនាយក នៃគណៈធម្មយុត្តិកនិកាយ នៃព្រះរាជាណាចក្រកម្ពុជា។
ក្នុងថ្ងៃ ទិវាព្រះពុទ្ធសាសនាអន្តរជាតិ ៨ មេសា ឆ្នាំ២០២៦

(ភ្នំពេញ)៖ ឯកឧត្តមបណ្ឌិតសភាចារ្យ ហង់ជួន ណារ៉ុនឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡាតំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ​បានអញ្ជើញចូលរួម​ ក្នុងពិធីអបអរសាទរ «ទិវា​ព្រះពុទ្ធសាសនាអន្តរជាតិ ​» ឆ្នាំ២០២៦ ក្រោមប្រធានបទ  «ពង្រឹងសាមគ្គីធម៌ ជំរុញសន្តិភាព តាមរយៈមាគ៌ាព្រះពុទ្ធសាសនា» នៅសាលសន្និសីទចតុម្មុខ។

នៅក្នុងពិធីនេះដែរ មានការយាង និមន្ត និងអញ្ជើញចូលរួមពីសំណាក់ សម្ដេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា, សម្តេចព្រះមហាសុមេធាធិបតី កិត្តិបណ្ឌិត អំ លីមហេង សម្តេចព្រះសង្ឃនាយក គណៈមហានិកាយ នៃព្រះរាជាណាចក្រកម្ពុជា, សម្តេចសង្ឃ​ព្រះសង្ឃនាយករង សម្ដេច ព្រះរាជាគណៈ​ ព្រះមន្រ្តីសង្ឃ, ឯកឧត្តម លោកជំទាវ សមាជិក សមាជិកា ​ព្រឹទ្ធសភា រដ្ឋសភា ទេសរដ្ឋមន្រ្តី រដ្ឋមន្ត្រី ​ ឯកអគ្គរាជទូត អគ្គរដ្ឋទូត តំណាងអង្គទូត លោកអ្នកឧកញ៉ា អ្នកឧកញ៉ា ឧកញ៉ា ឯកឧត្តម លោកជំទាវ ជាថ្នាក់ដឹកនាំ ទីប្រឹក្សា មន្រ្តីរាជការ ក្រសួង​-ស្ថាប័ន លោក លោកស្រី តំណាងសាសនិកគ្រប់សាសនា ព្រមទាំងនិស្សិតសរុបចំនួនជាង៩០០អង្គ/នាក់។

បន្ទាប់ពីសម្ដេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី និងសម្តេចព្រះមហាសុមេធាធិបតីកិត្តិបណ្ឌិត អំ លីមហេង  អានព្រះរាជសារថ្វាយព្រះពរ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា រួចមក  ឯកឧត្តមបណ្ឌិត ចាយ បូរិន រដ្ឋមន្រ្តីក្រសួងធម្មការនិងសាសនា បានអញ្ជើញអានព្រះរាជសារ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងថ្លែងសុន្ទរកថាស្វាគមន៍ ដោយបានគោរពថ្លែងអំណរគុណចំពោះវត្តមាន ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី តំណាងដ៏ខ្ពង់ខ្ពស់ សម្ដេចមហាបវរធិបតី​ នាយករដ្ឋមន្ត្រី នៃព្រះរាជាណាចក្រកម្ពុជាដែលបានឆ្លៀតឱកាសដ៏មមាញឹក អញ្ជើញចូលរួមជាអធិបតី ក្នុងពិធីអបអរសាទរ ទិវាព្រះពុទ្ធសាសនាអន្តរជាតិ ក្រោមប្រធានបទ «ពង្រឹងសាមគ្គីធម៌ ជំរុញសន្តិភាពតាមរយៈមាគ៌ាព្រះពុទ្ធសាសនា» ​នាឱកាសនេះ។ ឯកឧត្តមបណ្ឌិតរដ្ឋមន្ត្រី ក៏បានបញ្ជាក់ផងដែរ អំពីប្រវត្តិ និងគោលបំណងនៃ ទិវាព្រះពុទ្ធសាសនាអន្តរជាតិ ថាប្រារព្ធឡើង ដើម្បីលើកកម្ពស់ព្រះពុទ្ធសាសនាជាសាសនារបស់រដ្ឋ បង្កើនទំនាក់ទំនងអន្តរជាតិជាមួយបណ្តាប្រទេសអ្នកកាន់ព្រះពុទ្ធសាសនា នឹងជាការរំលឹកនូវព្រះរាជគុណូបការៈ ដ៏ឧត្តុង្គឧត្តមបំផុតរបស់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលទ្រង់ទទួលបាននូវព្រះរាជបរមងារកិត្តិយសដ៏ខ្ពង់ខ្ពស់បំផុតជា ព្រះស្រីលោកធម្មិករាជ ហើយក៏ជាការផ្សព្វផ្សាយគោលមាគ៌ាព្រះពុទ្ធសាសនាដើម្បីពង្រឹងសាមគ្គីធម៌ ជំរុញសន្តិភាព ​ក្នុងសង្គមជាតិនិងសកលលោក។

បន្ទាប់ពីបានជ្រាបអំពីប្រវត្តិ និងគោលបំណងនៃការរៀបចំទិវាព្រះពុទ្ធសាសនាអន្តរជាតិ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ​​ និងវាយតម្លៃខ្ពស់​ ចំពោះក្រសួងធម្មការនិងសាសនា និងគណៈសង្ឃនាយកទាំងពីរគណៈ ដែលបានសហការរៀបចំបានយ៉ាងល្អនូវ ទិវាព្រះពុទ្ធសាសនាអន្តរជាតិ ក្រោមប្រធានបទ «ពង្រឹងសាមគ្គីធម៌ ជំរុញសន្តិភាព តាមរយៈមាគ៌ាព្រះពុទ្ធសាសនា»​ ដែលជាប្រធានបទដ៏ស័ក្ដិសមបំផុតសម្រាប់រំលេចឱ្យឃើញអំពីតួនាទីព្រះពុទ្ធសាសនា ដើម្បីចូលរួមចំណែកកសាងនូវសាមគ្គីធម៌ ការអភិវឌ្ឍប្រទេសទាំងក្នុងវិស័យ​នយោបាយ សេដ្ឋកិច្ច សណ្តាប់ធ្លាប់សង្គម វប្បធម៌ និងសាសនា ជាពិសេស គឺការចូលរួមកសាងសាមគ្គីភាព សន្តិភាព សុខដុមរមនានៅក្នុងសង្គម ។ ជាងនេះ ក៏ជាកាលានុវត្តភាពមួយ បង្កើនការយល់ដឹងពីគុណតម្លៃស្នូល និងគោលការណ៍របស់ព្រះពុទ្ធសាសនាក្នុងការចូលរួមថែរក្សាសុខុមាលភាពសង្គម មិត្តភាព ភាតរភាព និងសាមគ្គីភាព ដើម្បីជំរុញឱ្យមាននូវសុខសន្តិភាពជានិរន្តរ៍សម្រាប់សង្គម និងពិភពលោក។

ឯកឧត្តមបណ្ឌិតសភាចារ្យ បានបន្ថែមថា ទិវាព្រះពុទ្ធសាសនាអន្តរជាតិ នៅព្រះរាជាណាចក្រកម្ពុជា នាពេលនេះ សមស្របទៅនឹងបរិបទនៃពិភពលោក​បច្ចុប្បន្ន កំពុងប្រឈមនឹងវិបត្តិជាច្រើន ដូចជាជម្លោះប្រដាប់អាវុ​ធ សង្រ្គាមសេដ្ឋកិច្ច ការបម្រែបម្រួលអាកាសធាតុ ភាពឡើងកំដៅនៃភូមិសាស្ត្រនយោបាយ ភាពផុយស្រួយនៃជម្លោះសាសនា ការបំពុលបរិស្ថាន​ ជំងឺឆ្លង និងគម្លាតសង្គម ធ្វើឱ្យមនុស្សរស់នៅមិនមានភាពចុះសម្រុង និងមិនយោគយល់គ្នា ព្រមទាំងបង្កភាពរាំងស្ទះដល់ការរីកចម្រើនរបស់សង្គម ហើយវិបត្តិទាំងនោះ បានក្លាយជាបញ្ហារួមនៅក្នុងសង្គម ក្នុងតំបន់ ក៏ដូចជាពិភពលោក ធ្វើឱ្យប៉ះពាល់ដល់សន្តិសុខ សណ្តាប់ធ្នាប់សង្គម សេដ្ឋកិច្ច និងវិស័យសាសនាទៀតផង។ ព្រះពុទ្ធសាសនា គឺជាមាគ៌ាមួយដ៏សំខាន់ក្នុងការបង្កើតនូវសាមគ្គីភាព ភាតរភាព និងរក្សាសន្តិភាព តាមរយៈការផ្តល់ឱវាទដោយផ្អែកលើព្រហ្មវិហារធម៌ សង្គហធម៌ និងមាគ៌ាកណ្តាល ដែលអាចជួយឱ្យបុគ្គល គ្រួសារ សង្គម និងពិភពលោក ប្រកាន់យកនូវវប្បធម៌អហិង្សា ការគោរពអធ្យាស្រ័យយោគយល់គ្នាខ្ពស់ ការប្រកាន់យកនូវសីលធម៌រស់នៅល្អ សុខដុមរមនា ដែលជាឧបករណ៍ចាំបាច់សម្រាប់សន្តិភាព និងការអភិវឌ្ឍប្រកបដោយចីរភាព។

មុននឹងបញ្ចប់ ឯកឧត្តមបណ្ឌិតសភាចារ្យ ក៏បានផ្តល់នូវទស្សនទានមួយចំនួនដូចខាងក្រោម៖

១.សូមឱ្យពុទ្ធបរិស័ទចូលរួមបំផុសប្រធានបទនាថ្ងៃនេះ ឱ្យបានទូលំទូលាយ ហើយប្រែក្លាយប្រធានបទនេះ ទៅជាសកម្មភាពជាក់ស្តែង ដើម្បីធានាឱ្យបាននូវសុខដុមរមនានៅក្នុងសង្គម និងសន្តិភាពជានិរន្តរ៍សម្រាប់មនុស្សជាតិនៅទូទាំងពិភពលោក។

២.សូមចូលរួមអភិវឌ្ឍព្រះពុទ្ធសាសនាឱ្យមានការរីកចម្រើនរុងរឿង លើកកម្ពស់តួនាទីព្រះពុទ្ធសាសនាក្នុងសង្គមតាមរយៈការអប់រំលើកកម្ពស់សីលធម៌សង្គម និងសុខភាពផ្លូវចិត្តរបស់ប្រជាជន ដែលបច្ចុប្បន្ននេះ កត្តាទាំងពីរនេះ គឺចាំបាច់និងបន្ទាន់ជាងពេលណាៗទាំងអស់។

​៣.ព្រះពុទ្ធសាសនាជាសាសនារបស់រដ្ឋ ដូច្នេះសូមឱ្យពុទ្ធសាសនិកជនគ្រប់រូប សិក្សាស្វែងយល់ឱ្យបានស៊ីជម្រៅ គោរពប្រតិបត្តិឱ្យត្រឹមត្រូវ បញ្ជៀសឱ្យបានជាដាច់ខាត ការយកសាសនាធ្វើជាឧបករណ៍ ដើម្បីស្វែងរកនូវប្រយោជន៍ផ្ទាល់ខ្លួន ។

៤.ទោះបីជាគោរពជឿជាក់លើនិកាយសាសនាអ្វីក៏ដោយ ភាពផ្សេងគ្នានៃជំនឿនិងសាសនា មិនមែនជារនាំងខាន់ចែកមិត្តភាព និងភាតរភាពរវាងគ្នានិងគ្នានោះទេ  ដូច្នេះត្រូវបន្តរក្សាសាមគ្គីភាពគ្នាជាធ្លុងមួយ ធ្វើការរួមគ្នា ដើម្បីឈានទៅសម្រេចឱ្យបាននូវឧត្តមប្រយោជន៍ ពោលគឺសន្តិភាពជូនជាតិមាតុភូមិ តាមរយៈការប្រតិបត្តិតាមទ្រឹស្តីដ៏ល្អឯករបស់សាសនានីមួយៗ ។

ក្នុងឱកាសនោះដែរ ដើម្បីរំលឹកនូវព្រះរាជគុណូបការៈដ៏ឧត្តុង្គឧត្តមបំផុតរបស់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលទ្រង់ទទួលបាននូវព្រះរាជបរមងារកិត្តិយសដ៏ខ្ពង់ខ្ពស់បំផុតជាព្រះស្រីលោកធម្មិករាជ ក្រសួងធម្មការនិងសាសនា បានរៀបចំពិធីសូត្រមន្តចម្រើនព្រះបរិត្ត និងរាប់បាត្រ ថ្វាយ ប្រគេន សម្តេចសង្ឃ ព្រះមន្រ្តីសង្ឃចំនួន៧៤ព្រះអង្គ  ដើម្បីថ្វាយព្រះរាជកុសលដល់ ព្រះករុណាថ្លៃវិសេស ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គទ្រង់ប្រកបដោយព្រះបរមសុខគ្រប់ប្រការ ដើម្បីគង់ប្រថាប់ជាម្លប់ដ៏ត្រជាក់​សម្រាប់ប្រជានុរាស្រ្តរបស់ព្រះអង្គ អស់កាលជានិច្ចនិរន្តរ៍។

(ហាណូយ) នៅរសៀលថ្ងៃទី ២៥ ខែមីនា ឆ្នាំ ២០២៦ ក្នុងឱកាសអញ្ជើញបំពេញទស្សនកិច្ចផ្លូវការនៅប្រទេសវៀតណាម  ឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការនិងសាសនាកម្ពុជា អញ្ជើញជួបសម្ដែងការគួរសមជាមួយ ឯកឧត្តម ឧបនាយករដ្ឋមន្ត្រី ម៉ៃ វ៉ាន់ជីញ នៅទីស្នាក់ការរដ្ឋាភិបាល។

ក្នុងកិច្ចប្រជុំនោះមានការចូលរួមដោយ ថ្នាក់ដឹកនាំក្រសួងធម្មការនិងសាសនាកម្ពុជា និងឯកឧត្តម អ៊ី ថុង អនុរដ្ឋមន្ត្រីក្រសួងកិច្ចការជនជាតិនិងសាសនា និងថ្នាក់ដឹកនាំនៃនាយកដ្ឋាន និងអង្គភាពជាច្រើនក្រោមក្រសួងកិច្ចការជនជាតិនិងសាសនា។
ក្នុងដំណើរទស្សនកិច្ចរបស់គណប្រតិភូកម្ពុជា មកកាន់សាធារណៈរដ្ឋសង្គមនិយមវៀតណាមនាឱនាសនេះ ឯកឧត្តម ឧបនាយករដ្ឋមន្ត្រី ម៉ៃ វ៉ាន់ជីញ បានទទួលស្វាគមន៍យ៉ាងកក់ក្តៅចំពោះ ឯកឧត្តមរដ្ឋមន្ត្រី ចាយ បូរិន និងគណៈប្រតិភូកម្ពុជា ដែលបានបំពេញទស្សនកិច្ចនៅប្រទេសវៀតណាម ចាប់ពីថ្ងៃទី ២៤ ដល់ថ្ងៃទី ២៦ ខែមីនា ឆ្នាំ ២០២៦។

ឯកឧត្តម ម៉ៃ វ៉ាន់ជីញ បានវាយតម្លៃខ្ពស់ចំពោះសារៈសំខាន់នៃដំណើរទស្សនកិច្ចនេះ ដោយកត់សម្គាល់ថា ជាការបង្ហាញនៅជំហរដ៏រឹងមាំនៃកិច្ចព្រមព្រៀងសហប្រតិបត្តិការរវាងក្រសួងកិច្ចការជនជាតិ និងសាសនាវៀតណាម និងក្រសួងធម្មការ និងសាសនាកម្ពុជា សម្រាប់រយៈពេល ២០២៦-២០៣០ ដែលទើបចុះហត្ថលេខានៅទីក្រុងភ្នំពេញថ្មីៗនេះ។ ឯកឧត្តម បាន មានប្រសាសន៍ថា កិច្ចព្រមព្រៀង នេះ ដើរតួនាទី យ៉ាងសំខាន់ ក្នុងការលើកកម្ពស់ កិច្ចសហការ ក្នុង កិច្ចការ សាសនា និង ជនជាតិ រវាង ប្រទេស ទាំងពីរ ខណៈពេលដែល រួមចំណែក ដល់ ការពង្រឹង មិត្តភាព អ្នកជិតខាង យូរអង្វែង កិច្ចសហប្រតិបត្តិការ គ្រប់ជ្រុងជ្រោយ និង ភាពជាដៃគូ ប្រកបដោយ ចីរភាព រវាង វៀតណាម និង កម្ពុជា។

ឯឧត្តម ឧបនាយករដ្ឋមន្ត្រី បាន បញ្ជាក់ថា ទំនាក់ទំនង ទ្វេរភាគី បាន បន្ត អភិវឌ្ឍ ជា លំដាប់ និង ទូលំទូលាយ លើ គ្រប់វិស័យ និង បាន សម្តែង ការពេញចិត្ត ចំពោះ លទ្ធផល នៃ ដំណើរទស្សនកិច្ច ផ្លូវរដ្ឋ នាពេលថ្មីៗនេះមកកាន់ប្រទេសកម្ពុជារបស់ ឯកឧត្តមអគ្គលេខាធិការ តូ ឡឹម ដែល ក្នុងអំឡុងពេល ដែល ភាគីទាំងពីរបានដឹកនាំកិច្ចប្រជុំកម្រិតខ្ពស់រវាងការិយាល័យនយោបាយនៃបក្សកុម្មុយនិស្តវៀតណាម និង គណៈកម្មាធិការអចិន្ត្រៃយ៍ នៃគណៈកម្មាធិការកណ្តាលនៃបក្សប្រជាជនកម្ពុជា ដែលដឹកនាំដោយសម្តេចតជោ ហ៊ុន សែនដោយជោគជ័យ ក៏ដូចជា កិច្ចប្រជុំ រវាង ថ្នាក់ដឹកនាំនៃគណបក្សទាំងបី គឺ វៀតណាម កម្ពុជា និង ឡាវ កាលពី ខែកុម្ភៈ។ ឯឧត្តមបានកត់សម្គាល់ថា ការចូលរួមទាំងនេះបានបង្កើនទំនុកចិត្តផ្នែកនយោបាយ និងបើកទិសដៅថ្មីសម្រាប់កិច្ចសហប្រតិបត្តិការដែលពង្រឹង បន្ថែមទៀតនូវសាមគ្គីភាពជិតស្និទ្ធរវាងប្រទេស ទាំងពីរ។

ឯកឧត្តម ឧបនាយករដ្ឋមន្រ្តីវៀតណាម ក៏បាន ស្វាគមន៍ ចំពោះ លទ្ធផល នៃ កិច្ចចរចា រវាង ឯកឧត្តម រដ្ឋមន្ត្រី ចាយ បូរិន និង ឯកឧត្តម រដ្ឋមន្ត្រី ក្រសួង កិច្ចការ ជនជាតិ និង សាសនា  ដាវ ងុកហ្សុង ដោយ សម្តែង ការពេញចិត្ត ចំពោះ លទ្ធផល វិជ្ជមាន នៃ កិច្ចសហប្រតិបត្តិការ រវាង ក្រសួង ទាំងពីរ ក្នុង ប៉ុន្មាន ឆ្នាំ ចុងក្រោយ នេះ។ ការចុះហត្ថលេខា លើ កិច្ចព្រមព្រៀង ថ្មី នេះ គឺជា ភស្តុតាង ដ៏ ច្បាស់លាស់ នៃ កិច្ចសហការ យ៉ាងជិតស្និទ្ធ ចំពោះការរួមចំណែករបស់ព្រះពុទ្ធសាសនាកម្ពុជាចំពោះវិបុលភាពរបស់ប្រទេស និងការអភិវឌ្ឍតំបន់។ ឯឧត្តមឧបនាយករដ្ឋមន្ត្រីបានបញ្ជាក់ជាថ្មីថា វៀតណាមគោរព និងធានាជានិច្ចនូវសិទ្ធិសេរីភាពខាងជំនឿ និងសាសនា ដោយបង្កើតលក្ខខណ្ឌអំណោយផលសម្រាប់អង្គការសាសនានានាក្នុងការដំណើរការស្របតាមច្បាប់។ ហើយ កិច្ចខិតខំប្រឹងប្រែងទាំងនេះ ជួយពង្រឹងឯកភាពជាតិ រក្សាស្ថិរភាពសង្គម-នយោបាយ និងលើកកម្ពស់ការអភិវឌ្ឍជាតិ។ ព្រះពុទ្ធសាសនា រួមជាមួយសាសនាដទៃទៀត បន្តទទួលបានការយកចិត្តទុកដាក់ និងរីកចម្រើនក្រោមគោលការណ៍ណែនាំនៃ “ជីវិតល្អ ជំនឿដ៏ស្រស់ស្អាត”។
ឯកឧត្តមបានបន្ថែមថា វៀតណាមត្រៀមខ្លួនជាស្រេចដើម្បីបង្កើនការផ្លាស់ប្តូរ និងចែករំលែកបទពិសោធន៍ជាមួយកម្ពុជាក្នុងការគ្រប់គ្រងកិច្ចការសាសនារបស់រដ្ឋ ដោយសម្តែងក្តីសង្ឃឹមថា ភាគីទាំងពីរនឹងបន្តសម្របសម្រួលយ៉ាងជិតស្និទ្ធ និងពង្រឹងកិច្ចសហប្រតិបត្តិការក្នុងវិស័យនេះ ។ដោយសង្កត់ធ្ងន់លើសារៈសំខាន់នៃការទប់ស្កាត់កម្លាំងអរិភាពពីការកេងប្រវ័ញ្ចបញ្ហាជនជាតិ និងសាសនា ដើម្បីបំផ្លាញទំនាក់ទំនងទ្វេភាគី ខណៈពេលដែលអំពាវនាវឱ្យមានការគាំទ្រគ្នាទៅវិញទៅមកកាន់តែខ្លាំងឡើងនៅក្នុងវេទិកាតំបន់ និងអន្តរជាតិ ជាពិសេសនៅក្នុងអាស៊ាន។
ក្នុងឱកាសនេះ ឯកឧត្តម ឧបនាយករដ្ឋមន្រ្តីបានផ្ញើរសារជូនពរឆ្នាំថ្មីសម្រាប់ឱកាសចូលឆ្នាំថ្មី ប្រពៃណីខ្មែរឆ្នាំ២០២៦ ជូនដល់ថ្នាក់ដឹកនាំរដ្ឋាភិបាលកម្ពុជា និងឯកឧត្តមរដ្ឋមន្ត្រី ចាយ បូរិន និងគណៈប្រតិភូ ព្រមទាំងប្រជាជនកម្ពុជាផងដែរ។

ឯកឧត្តមរដ្ឋមន្ត្រី ចាយ បូរិន បានថ្លែងអំណរគុណយ៉ាងជ្រាលជ្រៅចំពោះឯកឧត្តមឧបនាយករដ្ឋមន្ត្រី ម៉ៃ វ៉ាន់ជីញ ចំពោះការទទួលស្វាគមន៍យ៉ាងកក់ក្តៅ និងមានអត្ថន័យនាឱកាសនេះ ។
នៅក្នុងដំណើរទស្សនកិច្ចមកកាន់ប្រទេសវៀតណាមដ៏មានតម្លៃនេះគណៈប្រតិភូកម្ពុជា បានការយល់ដឹងកាន់តែស៊ីជម្រៅអំពីវប្បធម៌ ប្រជាជន និងការអភិវឌ្ឍរបស់ប្រទេសវៀតណាម ជាពិសេសនៅក្នុងវិស័យជនជាតិភាគតិច និងសាសនា។
ឯកឧត្តមក៏បានកោតសរសើរចំពោះលទ្ធផលនៃការពិភាក្សាជាមួយឯកឧត្តមរដ្ឋមន្ត្រី  ដាវ ងុកហ្សុង  នឹងបានសម្តែងក្តីសង្ឃឹមថា រដ្ឋាភិបាលវៀតណាមនឹងបន្តគាំទ្រ និងលើកកម្ពស់កិច្ចសហប្រតិបត្តិការជាមួយកម្ពុជាលើវិស័យផ្សេងៗ ជាពិសេសក្នុងវិស័យជនជាតិភាគតិច និងសាសនា។

ក្នុងបរិយាកាសគោរព និងរួសរាយរាក់ទាក់ ភាគីទាំងពីរបានព្រមព្រៀងគ្នាបន្តបង្កើនការផ្លាស់ប្តូរនៅគ្រប់កម្រិត អនុវត្តកិច្ចព្រមព្រៀងដែលបានចុះហត្ថលេខាប្រកបដោយប្រសិទ្ធភាព ពង្រីកកិច្ចសហប្រតិបត្តិការលើវិស័យជាច្រើន និងរៀបចំសកម្មភាពរួមគ្នាដើម្បីអបអរសាទរខួបលើកទី៦០ នៃទំនាក់ទំនងការទូតរវាងប្រទេសទាំងពីរ។
      

នៅរសៀលថ្ងៃទី ២៥ ខែមីនា ឆ្នាំ២០២៦ ឯកឧត្តម ចាយ បូរិន រដ្ឋមន្ត្រីក្រសួងធម្មការនិងសាសនា នៃព្រះរាជាណាចក្រកម្ពុជា បានអញ្ជើញសវនការដើម្បីពិភាក្សាការងារជាមួយ ឯកឧត្តម ដាវ ងុកហ្សុង រដ្ឋមន្ត្រី ក្រសួងកិច្ចការជនជាតិភាគតិចនិងសាសនា នៅទីស្នាក់ការកណ្តាលក្រសួង សាធារដ្ឋសង្គមនិយមវៀតណាម។ 

ក្នុងកិច្ចប្រជុំនេះ ក៏មានការចូលរួមពី ថ្នាក់ដឹកនាំក្រសួងធម្មការនិងសាសនាកម្ពុជា និង ឯកឧត្តមអនុរដ្ឋមន្ត្រី អ៊ី ថុង និងថ្នាក់ដឹកនាំនៃនាយកដ្ឋាន និងមន្ត្រីមកពីអង្គភាពជាច្រើនរូប ក្រោមក្រសួងកិច្ចការជនជាតិភាគតិចនិងសាសនា ផងដែរ។

ថ្លែងនៅក្នុងកិច្ចប្រជុំនោះ ឯកឧត្តម ចាយ បូរិន រដ្ឋមន្ត្រីក្រសួងធម្មការនិងសាសនា បានសម្តែងនូវសេចក្តីរីករាយ និងការកោតសរសើរយ៉ាងស្មោះស្ម័គ្រចំពោះការទទួលស្វាគមន៍យ៉ាងកក់ក្តៅ និងយកចិត្តទុកដាក់ពីសំណាក់ ឯកឧត្តម ដាវ ងុកហ្សុង រដ្ឋមន្ត្រីក្រសួងកិច្ចការជនជាតិភាគតិចនិងសាសនា ទៅកាន់គណៈប្រតិភូកម្ពុជាក្នុងអំឡុងពេលទស្សនកិច្ចការងារនេះ។

នៅក្នុងកិច្ចប្រជុំនោះ ឯកឧត្តម ដាវ ងុកហ្សុង បានសង្កត់ធ្ងន់ថា កិច្ចព្រមព្រៀងសហប្រតិបត្តិការទ្វេភាគីដែលបានចុះហត្ថលេខានៅថ្ងៃទី ៦ ខែកុម្ភៈ ឆ្នាំ ២០២៦ គឺជាព្រឹត្តិការណ៍ដ៏សំខាន់មួយដែលមានសារៈសំខាន់ជាប្រវត្តិសាស្ត្រ។ បានរួមចំណែកដល់ការលើកកម្ពស់កិច្ចសហប្រតិបត្តិការរវាងក្រសួងទាំងពីរក្នុងលក្ខណៈកាន់តែស៊ីជម្រៅ ជាក់ស្តែង និងមានប្រសិទ្ធភាព។

ក្នុងនោះ ឯកឧត្តម ចាយ បូរិន  បានថ្លែងអំពីលទ្ធផលជាក់ស្តែងដែលសម្រេចបានក្នុងអំឡុងពេលទស្សនកិច្ចនេះ ជាពិសេសវគ្គបណ្តុះបណ្តាលនៅខេត្តនិញប៊ិញ ដែលផ្តល់នូវបទពិសោធន៍ដ៏មានតម្លៃក្នុងការគ្រប់គ្រងកិច្ចការជនជាតិភាគតិចនិងសាសនារបស់រដ្ឋ។

ឯកឧត្តម ចាយ បូរិន បានកត់សម្គាល់ថា “យើងមានសេចក្តីសោមនស្សរីករាយក្នុងការសង្កេតឃើញថា ដោយផ្អែកលើកិច្ចព្រមព្រៀងសហប្រតិបត្តិការទ្វេភាគីរវាងក្រសួងកិច្ចការជនជាតិ និងសាសនាវៀតណាម និងក្រសួងធម្មការនិងសាសនា នៃព្រះរាជាណាចក្រកម្ពុជា ដែលបានចុះហត្ថលេខានៅថ្ងៃទី ៦ ខែកុម្ភៈ ឆ្នាំ ២០២៦ នៅទីក្រុងភ្នំពេញ ក្រោមការអញ្ជើញរបស់ ឯកឧត្តមអគ្គលេខាធិការ តូ ឡាំ និងប្រធានគណបក្សប្រជាជនកម្ពុជា សម្ដេចតេជោ ហ៊ុន សែន លើកិច្ចសហប្រតិបត្តិការរវាងក្រសួងទាំងពីរក្នុងកិច្ចការជនជាតិ និងសាសនានៅតែបន្តពង្រឹង និងអភិវឌ្ឍយ៉ាងរឹងមាំ”។ ដើម្បីអនុវត្តខ្លឹមសារដែលបានចុះហត្ថលេខាប្រកបដោយប្រសិទ្ធភាព ភាគីកម្ពុជាបានបង្កើតក្រុមការងារពិសេសមួយដើម្បីសម្របសម្រួលយ៉ាងជិតស្និទ្ធជាមួយក្រសួងកិច្ចការជនជាតិ និងសាសនាវៀតណាម។

ក្នុងឱកាសនេះ ឯកឧត្តមរដ្ឋមន្ត្រីក្រសួងធម្មការនិងសាសនាកម្ពុជា បានស្នើឱ្យភាគីទាំងពីរបន្តពង្រឹងការសម្របសម្រួលក្នុងការកសាង និងអនុវត្តគោលនយោបាយសម្រាប់សហគមន៍ជនជាតិភាគតិចដែលរស់នៅតាមបណ្តោយព្រំដែនរួមគ្នា។ កិច្ចខិតខំប្រឹងប្រែងទាំងនេះមានគោលបំណងលើកកម្ពស់ជីវភាពរស់នៅ រក្សាស្ថិរភាព និងលើកកម្ពស់ការអភិវឌ្ឍប្រកបដោយចីរភាព។ ឯកឧត្តមក៏បានអំពាវនាវឱ្យមានការរៀបចំយ៉ាងសកម្មនៃសន្និសីទទ្វេភាគីដើម្បីពិនិត្យ វាយតម្លៃ និងពន្លឿនការអនុវត្តខ្លឹមសារដែលបានព្រមព្រៀងគ្នាក្រោមក្របខ័ណ្ឌសហប្រតិបត្តិការ។

លើសពីនេះ ឯកឧត្តម ចាយ បូរិន បានសម្តែងក្តីសង្ឃឹមថា ភាគីទាំងពីរនឹងលើកកម្ពស់កម្មវិធីសហប្រតិបត្តិការក្នុងការអភិរក្ស និងលើកកម្ពស់តម្លៃវប្បធម៌ជនជាតិ រួមទាំងការស្រាវជ្រាវ និងអភិវឌ្ឍន៍គំរូសារមន្ទីរជនជាតិនៅកម្ពុជា។ លើកកម្ពស់កិច្ចសហប្រតិបត្តិការវៀតណាម-កម្ពុជា ក្នុងកិច្ចការជនជាតិ និងសាសនាដោយយល់ស្របនឹងទស្សនៈរួមគ្នារបស់ឯកឧត្តមរដ្ឋមន្ត្រីកម្ពុជា ឯកឧត្តមរដ្ឋមន្ត្រី ដាវ ងុកហ្សុង  បានបញ្ជាក់ថា ការពិភាក្សា ជាពិសេសការពិភាក្សាដែលឆ្លុះបញ្ចាំងនៅក្នុងកិច្ចព្រមព្រៀងទ្វេភាគី បង្ហាញពីការប្តេជ្ញាចិត្តរួមគ្នាក្នុងការពង្រឹងកិច្ចសហប្រតិបត្តិការរវាងក្រសួងទាំងពីរ និងរួមចំណែកដល់ការពង្រឹងមិត្តភាពប្រពៃណីរវាងប្រទេសទាំងពីរ។

ឯកឧត្តម ដាវ ងុកហ្សុង  បានសង្កត់ធ្ងន់ថា៖ «នៅថ្ងៃទី ៦ ខែកុម្ភៈ ឆ្នាំ ២០២៦ ក្រសួងទាំងពីរបានចុះហត្ថលេខាលើកិច្ចព្រមព្រៀងសហប្រតិបត្តិការទ្វេភាគី ក្រោមការធ្វើជាសាក្សីរបស់ថ្នាក់ដឹកនាំជាន់ខ្ពស់នៃប្រទេសទាំងពីរ។ នេះពិតជាព្រឹត្តិការណ៍ដ៏សំខាន់មួយដែលមានសារៈសំខាន់ជាប្រវត្តិសាស្ត្រ ដែលរួមចំណែកដល់ការលើកកម្ពស់កិច្ចសហប្រតិបត្តិការរវាងទីភ្នាក់ងារទាំងពីរក្នុងទិសដៅកាន់តែជាក់ស្តែង និងមានប្រសិទ្ធភាព»។ដូចប្រទេសកម្ពុជាដែរ វៀតណាមតែងតែកំណត់ជានិច្ចនូវកិច្ចការជនជាតិ និងសាសនាជាបញ្ហាយុទ្ធសាស្ត្រក្នុងការកសាង និងពង្រឹងប្លុកឯកភាពជាតិដ៏អស្ចារ្យ។ វៀតណាមជាជម្រករបស់ក្រុមជនជាតិចំនួន ៥៤ និងសាសនាសំខាន់ៗចំនួន ១៦ ៕