ភ្នំពេញ៖ នាថ្ងៃទី២០ ខែសីហា ឆ្នាំ២០២៦ ឯកឧត្តម ចាយ បូរិន រដ្ឋមន្ត្រីក្រសួងធម្មការនិងសាសនា និង ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួង បរិស្ថាន បានចុះហត្ថលេខារួម លើអនុស្សរណៈយោគយល់គ្នា របស់ក្រសួងទាំងពីរ ដើម្បីផ្តល់កិច្ចសហប្រតិបត្តិការ ក្នុងក្របខ័ណ្ឌបង្កើនការយល់ដឹង សាធារណៈ ការអប់រំបរិស្ថាន និងជំរុញការចូលរួមរបស់សហគមន៍សាសនា វត្តអារាម និងស្ថាប័នពាក់ព័ន្ធក្នុងសកម្មភាពការពារបរិស្ថាន នៅទីស្តីការ ក្រសួងបរិស្ថាន។
នាឱកាសនេះ ឯកឧត្តម ចាយ បូរិន បានមានប្រសាសន៍ថា អនុស្សរណៈនៃការ យោគយល់គ្នានេះ គឺជាឯកសារដ៏មានសារៈសំខាន់និងជាសក្ខីភាពនៃ កិច្ចសហប្រតិបត្តិការលើការអភិរក្សធនធានធម្មជាតិ កិច្ចគាំពារបរិស្ថាន និងកា រអភិវឌ្ឍវិស័យធម្មការនិងសាសនា ប្រកបដោយចីរភាពរវាងក្រសួងទាំងពីរ ដើម្បីពង្រឹងកិច្ចសហការការពារបរិស្ថាន លើកទឹកចិត្តដល់ធុរកិច្ចបៃតង របស់វត្តអារាម សហគមន៍សាសនា មានការទទួលខុសត្រូវខ្ពស់លើបរិស្ថាន ឆ្ពោះ ទៅការអភិវឌ្ឍប្រកបដោយចីរភាព។
ដោយឡែកការចុះMOU រវាងក្រសួងទាំង២នៅថ្ងៃនេះប្រារព្ធឡើងក្រោមគោលបំណងសំខាន់ៗចំនួន៤រួមមាន៖ ១. ពង្រឹងកិច្ចសហប្រតិបត្តិការរវាងភាគី ទាំងពីរ លើការអភិរក្សធនធានធម្មជាតិ កិច្ចគាំពារបរិស្ថាន និងការអភិវឌ្ឍវិស័យធម្មការនិងសាសនាប្រកបដោយចីរភាព។ ២. លើកកម្ពស់ការអប់រំ សីលធម៌បរិស្ថាន និងការយល់ដឹងអំពីការការពារធនធានធម្មជាតិ តាមរយៈស្ថាប័នសាសនានិងសហគមន៍។ ៣. ជំរុញការចូលរួម ពីស្ថាប័នព្រះសង្ឃ ទាំងពីរគណៈ អង្គការ សមាគមដែលមានចរិតសាសនា សហគមន៍ និងសាធារណជន ក្នុងសកម្មភាពការពារបរិស្ថាន និងការប្រែប្រួលអាកាសធាតុ។ ៤. រួមចំណែកកសាងសង្គមកម្ពុជាដើម្បីសម្រេចបាននូវភាពស្អាត បៃតង និងប្រកប ដោយចីរភាព។
ឯកឧត្តមរដ្ឋមន្ត្រី បានមានប្រសាសន៍បញ្ជាក់ថា ក្រសួងធម្មការនិងសាសនា បានដាក់ចេញនៅអភិក្រម ស៣ គឺ «វត្តស្អាត វត្តស្វាង វត្តស្ងប់ » ដែលបាន ផ្សារភ្ជាប់ជំនឿ និងតួនាទីរបស់ព្រះសង្ឃ លើការបំផុសស្មារតីដល់ប្រជាពលរដ្ឋ ពុទ្ធបរិស័ទឱ្យស្រឡាញ់ និងចូលរួមការពារបរិស្ថាន តាមរយៈការគ្រប់ គ្រងកាកសំណល់ និងសំរាមនៅក្នុងវត្តអារាម និងសហគមន៍ ជុំវិញឱ្យបានត្រឹមត្រូវសំដៅកាត់បន្ថយការប្រើប្រាស់ប្លាស្ទិក និងការជំរុញចលនាដាំដើមឈើ ការបង្កើតសួនច្បារបៃតងនៅក្នុងបរិវេណសាសនដ្ឋាន ព្រមទាំងកសាងទម្លាប់រស់នៅស្អាត ផ្នត់គំនិតគិតគូរពីបរិស្ថានសម្រាប់មនុស្សគ្រប់ជំនាន់ ស្របតាម យុទ្ធសាស្រ្តចក្រាវិស័យបរិស្ថានរបស់រាជរដ្ឋាភិបាល។
ផ្អែកលើមូលដ្ឋានគ្រឹះដ៏រឹងមាំផ្អែកលើវប្បធម៌ ប្រវត្តិសាស្ត្រ និងសាសនា ក្រោមកម្មវិធីនយោបាយរបស់រាជរដ្ឋាភិបាល ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជណាចក្រកម្ពុជា សម្រាប់ការកសាងនិងការការពារមាតុភូមិឆ្នាំ២០២៣-២០២៨ ចង្អុលបង្ហាញយ៉ាងច្បាស់ស្តីពីការ អភិរក្ស និងការអភិវឌ្ឍវិស័យសាសនា មានជាអាទិ៍ ១) គោរពសេរីភាពខាងជំនឿ និងធ្វើប្រណិប័តន៍ខាងផ្លូវសាសនា លើកស្ទួយព្រះពុទ្ធសាសនាដែលជា សាសនារបស់រដ្ឋ និងគាំទ្រ ការគោរពប្រតិបត្តិសាសនាផ្សេងៗទៀត ក្នុងព្រះរាជាណាចក្រកម្ពុជា។ ២) ពង្រឹងសុខដុមនីយកម្មរវាងគ្រប់សាសនា ជាតិ សាសន៍ក្នុងព្រះរាជាណាចក្រកម្ពុជា។ ៣) បន្តពង្រឹងនិងពង្រីកពុទ្ធិកសិក្សាគ្រប់កម្រិត។ ដើម្បីឆ្លើយតបទៅនឹងយុទ្ធសាស្ត្រ និងគោលនយោបាយជាសារវ័ន្ត ខាងលើ ក្រសួងបានកំណត់ដាក់ចេញនូវសរសរស្តម្ភចំនួន៥ សម្រាប់អនុវត្តរយៈពេល៥ឆ្នាំ២០២៤-២០២៨ រួមមាន៖
១). ការលើកកម្ពស់សាសនារបស់រដ្ឋ ២). ការលើកកម្ពស់សីលធម៌សង្គម ៣). ការរក្សាសុខដុមនីយកម្មសាសនា ៤). ការពង្រឹងគុណភាពពុទ្ធិកសិក្សា គ្រប់កម្រិត ៥). ការអភិវឌ្ឍសមត្ថភាពស្ថាប័ននិងធនធានមនុស្ស ដើម្បីចូលរួមដល់ការអភិរក្សវប្បធម៌ ថែរក្សាការពារ សាសនា ប្រពៃណី បរិស្ថាន ធនធាន ធម្មជាតិរបស់យើង ប្រកបដោយប្រសិទ្ធភាពនិងការទទួលខុសត្រូវខ្ពស់។
ឱកាសនោះ ឯកឧត្តមបណ្ឌិត អ៊ាង សុផល្លែត បានថ្លែងថា សមិទ្ធផលនិងការងារបរិស្ថាន គឺត្រូវបានកសាងឡើងនៅលើគ្រឹះដ៏រឹងមាំនៃសន្តិភាព ស្ថិរភាព និងការអភិវឌ្ឍ ប្រកបដោយចក្ខុវិស័យវែងឆ្ងាយ របស់រាជរដ្ឋាភិបាលក្រោមការដឹកនាំ សម្តេចអគ្គមហាសេនាបតីតេជោ ហ៊ុន សែន បច្ចុប្បន្នជាប្រធាន ព្រឹទ្ធសភានៃព្រះរាជាណាចក្រកម្ពុជា ការណ៍នេះ បានអនុញ្ញាតឱ្យកម្ពុជា មានលទ្ធភាពគិតគូរ ដល់ចីរភាពបរិស្ថានយ៉ាងសំខាន់។ រាជរដ្ឋាភិបាល នីតិ កាលទី៧ នៃរដ្ឋសភា ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបន្តដាក់ចេញគោលនយោបាយ និងយុទ្ធសាស្ត្រដ៏ច្បាស់លាស់ បញ្ចូលបញ្ហាបរិស្ថាន ទៅក្នុងបេះដូងនៃដំណើរការអភិវឌ្ឍន៍របស់កម្ពុជា ដើម្បីធានាថា ប្រទេសជាតិរបស់យើងនឹងរីកចម្រើន ទៅមុខប្រកបដោយភាពស្អាត ភាពបៃតង និងចីរភាព។
ឯកឧត្តមបានថ្លែងបន្ថែមថាអនុស្សរណៈយោគយល់គ្នា ស្តីពីការជំរុញកិច្ចគាំពារគុណភាពបរិស្ថាន ក្នុងវិស័យសាសនា បានបង្ហាញពីការយកចិត្តទុកដាក់ និងសហការខ្ពស់ រវាងក្រសួងធម្មការនិងសាសនា និងក្រសួងបរិស្ថានក្នុងការជំរុញការអនុវត្តច្បាប់ និងបទប្បញ្ញត្តិកិច្ចគាំពារបរិស្ថាន ក្នុងវិស័យសាសនា នៅកម្ពុជា សម្រាប់ការលើកកម្ពស់ការការពារសុខភាពសាធារណៈ និងបរិស្ថាន នៅតាមវត្តអារាម និងសហគមនិកាយសាសនាផ្សេងៗដែលកំពុងប្រតិបត្តិ នៅកម្ពុជា ប្រកបដោយសុខដុមនីយកម្មសាសនាជានិរន្តរ៍៕
